قصيدة يا امي / بقلم الشاعر عمر بنحيد

يا امي:

يا امي

كلنا أولادك

علاش لفرق؟

واحد يسرق

وعلينا يبصق.

واحد يعشق

ويتسحق.

يا امي

علاش الفرق؟

واحد ينهب

وبذيلو يلعب

والكل لو يصفق.

واحد يعاتب

و ف قربك راغب

ترميه ف بير مغبق.

يا أمي

علاش الفرق؟

ياك كلنا ليك اولاد

اللي ف راسو الخواض

 واكل رزق لعباد

يحقق  ما راد.

واللي قلبو بك يهتف

مايكذب مايخطف

ريشو  يتنتف.

يا أمي

علاش الفرزية؟

ياك السباب الميزيرية١

صلحي  الوضعية

طهلاي٢  ف اولادك شوية

راك عزيزة عليهم

تحت جناحك ضميهم

وبحبك ربطيهم

بغيهم كيف يبغيوك

لاتحگريهوم

هما يديك ورجليك

 ضو عينيك

هما مستقبلك

وباش الله ياتيك.

يا امي

 علاش الفرق؟

واحد يخدم ويتعب

ما يأكل حتى يشبع

واحد يكذب وينهب

علينا كاملين يتشلهب

و عايش مبرع.٣

يا امي

انت وحدة

وبونا واحد

من جد لجد

عاطيين لعهد

والله علينا شاهد

يا امي

فكري ف الغد

لاتبني بنا(بيننا) سد

ولا  ديري حد

راه ماعندنا حد

من غيرالله وانتي

وحنا كلنا اولادك

ياك مانسيتي ؟

١ الميزيرية: la misére. أي الفقر المدقع. __٢: طهلاي : إهتمي أكثر .  ----٣: مبرع: مستمتع.

عمربنحيدي.                                     28/6/2018